No One Kisses At Night (Kisah Tragis Perjalanan Cinta Julekha & Sapi'i)

Perkenalkan, nama gue Julekha. Okee... okee.. stop! jangan ketawa! gue tau emang nama gue tuh kampung abissss... (backsound teriakan "wuuuuuuuu" anak satu kecamatan) eh tapi... gue make nama ini buat ngehargain jerih payah enyak babeh gue cuungg! ("cung, cung, kacungg kali!"--salah satu penonton protes)eittss..! udeh ah, penonton ga usah ribut dulu! nyang penting nih ye, gue mau ceritain sesuatu ame elo-elo semuanye! cerita tentang pengalaman pribadi gue, yang gue sebut sebagai... jreng jreng jreng jreeengg... KISAH HIDUP SEORANG JULEKHA ! eh, terlalu narsis ah.. coba gue pikir-pikir dulu.. ehm... (mikir sambil garuk-garuk pantat) oke! judulnya tentaaang... KISAH CINTA JULEKHA DAN SAPI'I.. ONE KISSES EVERY NIGHT !!(ketawa-ketawa bangga karena sok inggris).

"woy ! kapan neh mule ceritanyee?? kebayakan gaya loo!!" --backsound  suara seorang penonton

"iye, iye daah... ribut bener dah.. nyok kite mulai ajee... duduk manis ye penontoon..."

***

Suatu hari di malem minggu. seperti malem-malem spesial pada umumnya, malem minggu itu emang biasenye dinikmati ame muda mudi yang pade pacaran sebagai hari "yayang-yayangan". kagak peduli dah tuh malem minggu mau malem minggu kliwon kek, malem minggu pawon kek, bleguk kek, (eh, yang terakhir ntu kok rada aneh ya kalo dimasukin buat name hari?) pokoknya semua makhluk dibumi ini termasuk dedemit-dedemit yang wujudnye beneran setan ampe yang jadi-jadian pasti bakal ngerasain nyang namanye "malem minggu". tapi bedanye, rasa alias taste dari yang namenye malem minggu ntu bakalan beda berdasarkan status yang lagi disandang ntu makhluk. bingung ? yaaa.. gini lho maksud gue. semua makhluk dibumi ini kan punye status noh. dari hewan, tumbuh-tumbuhan, manusia, ampe dedemit-dedemit di alam laen juga pasti punya status. lha, emang statusnye ape ? statusnyee yang umum kate orang-orang tuh ade 3, nyang satu status JOMBLO; status paling ngenes seantero jagad raye. coba dah elo-elo liatin, muka orang-orang nyang pade jomblo ntu bisa ketebak dari awal. biasenye nih ye, ciri-ciri orang jomblo tuh : ga keurus, muka rada-rada keritis, alias kering bin teriris; raut muka kayak abis ditagih utang satu taun, belipet 12. wah, beneran ngenes abis. Status kedua ntu RELATIONSHIP alias BERPACARAN. naah... status nyang satu ini nih yang full of love. kemane-mane pengennya berdua mulu. udeh kayak prangko berjalan bener dah. lengkeeettt mulu. ngemol berdua, makan berdua, jalan berdua, ngampus berdua, ke toilet berdua (ups, nyang terakhir ini nih yang gawat). pkoknya, nyang namenye pacaran tuh berasa dunia milik berdua lah, yang laen tuh pade ngontrrak. trus status ke tige, yaitu status yang bikin orang yang ngejalaninnye berkecendrungan buat bunuh diri. Bener-bener berasa dunia kiamat. lha, emangnye ampe sebegononye ? tragis bener ?? lha iya! gue sebut ini sebagai status.. BERCERAIalias PISAH alias PUTUS CINTA ! nah loh, eng ing eng... kok statusnya bercerai ? iyaa dong! biar kesannye agak-agak tragis gituu.. (langsung dapet serangan bata orang sekampung) oke oke! kok jadi gue sih yang jadi korban ? pokoknya, status ketiga adalah status yang bikin orang yang ngejalaninnya jadi terkena syndromemales; yakni males makan, males mandi, males sikat gigi, males bobok, males pup... (ihh yuck !!) karena keingetan terus ama si biang kerok. siapa tuh biang keroknye ? yaa elo tanya ajaa sendiri ama bocah yang ngalamin, masa' ama gue???

Nah, balik lagi ke konteks awal, malem minggu emang malemnya anak muda. malem dimana para makhluk Tuhan berkasih sayang ato sekedar jalan-jalan geje buat ngilangin BT or ngilangin galau. begitu juga buat gue. malem minggu adalah malem nyang menurut gue merupakan malem panjang yang kudu-mesti-wajib-harus dilewatin bareng si yayang tersayang. oiyee, gue belom ngenalin yayang gue ye ? namenye si Sapi'i. cwok paling ganteng seantero jagat. cowok cool nan perfect anak kampung sebelah nyang bikin gue tergile-gile ampe mau mampus. ganteeengg abisss ciiiinggg! walopun die cuma dagang bakso, tapi tetep aja bagi gue die bagaikan orang kerja kantoran! ganteng, baik, widiiihhh... pkoknye asli, tu laki satu bener-bener bikin gue bertekuk lutut deh ame die!

nah, dimalem minggu begini, biasanya gue ama die sih jalan-jalan keliling kampung. Tapi hari ini, laki gue lagi cape banget katenye. Jadilah malem minggu ini cuma bisa telpon-temponan buat ngelepasin kangen gue nyang tiap hari bejubun bener dah buat die. gue emang cinta abis ama laki gue ini. udah cakep, baik, perhatian abis.. widihhh.. bikin merinding boo!

Diatas kasur kamar tidur gue yang udah mule tipis, pukul 20.00.

tuut. tuut. tuut.

"Haloo yayangg.."

"eh ayang. met malem yang.. lagi apah?"

"baru aja abis makan yang. yayang uda makan belom ?"

"ude yang. ini lagi bobo'an aje sih. si ayang suaranya tambah imut aje.."

"idiiihh, ayang pinter bener dah ngerayunye.. ayang juga ganteng bener dah. gara-gara sering bikin bakso jadi sixpack nih..."

"ih, si ayang. jadi merinding nih dibilang ganteng.,"

"yee, kok jadi merinding sih yang, kan ga diapa-apain ame Eha.,"

"hehehe.. oh iya yang, aye mau cerita nih, tapi ayang jangan marah ya..."

"emang mau cerita apaan yang ?"

" Kakanda ayang, si Sapi'i, juragan bakso dari Betawi asli ini tadi abis ditembak yang ama cwek tukang jamu kampung sbelah.."

"Ditembak? kok gak mati yang?"

"idihh.. si ayang.. maksudnya abang dapet pernyataan cinte dari cewek tukang jamu kampung sebelah.,"

"UAPAAAA??? COBA NGEMENG SEKALI LAGI ???"

"ih, si ayang.. kan bang Pi'i bilang yayang Julekha ga boleh ngomel-ngomel.."

"huh !! pegimane aye kagak ngomel-ngomel bang, abang ngemeng begono ! trus sape name tu empok-empok ?! biar aye pites dulu ! abang juga neh, keganjenan!"

"Ih, ayang.. kan nggak abang terime cintanye die.. jangan ngomel yee.. nanti Eha jadi jelek kalo ngomel-ngomel.."

"huh !!"

"Yang.."

"..."

"yayaang.."

"..."

"Yayang Eha-nye abang nyang paling cantiiikk.."

"Ape?!"

"Abang mau bobo dulu ye..."

"Huh !!"

"Sun dulu dong.."

"Ogah!"

"ih, pan biasenye yayang Eha sun abang dulu kalo abang mau bobo.. udah ritual wajib kite..."

"Hari ini kagak ade jatah !"

"yayaang..."

"udeee, tidur sono!!!"

Cklek. tuut. tuut. tuuut.

begitulah. hari itu gue lagi dongkol bener ame yayang gue, si Sapi'i juragan bakso. malem itu gue kagak nge-sun die; --salah satu ritual wajib gue ame yayang gue-- soalnye tu laki satu bener-bener lagi bikin gue galau(backsound iklan kartu AS pas adegan si cowok lagi bediri di tembok jebatan sambil treak : "tanpamu, aku galaauuuu~") gara-gara die ditembak cewek laen. catat sodara-sodara: DITEMBAK CEWEK LAEN! seketika hati gue berasa pecah dan hancur berkeping-keping.  

***

Keesokan paginye, pukul 08.00

"Enyaaakk, Pi'i mao ke pasar dulu ye...! mao beli bahan buat bikin baksoo...!"

"Iyee, ati-ati perginye ! pulangnye cepetan, jangan mampir-mampir ke rumah janda kembang lo!"

"Duileh si emakk, dikirenye Pi'i laki mane ?? Pi'i masih bener mak, belom mao sesat, Pi'i cume mao belanja doangan..!"

"Yaude sono ! ntar kesiangan !"

"Pegi dulu ye makk... Assalamu'alaikuuuuuuuumm~!"

"Wa'alaikum salam.."

Pagi itu, laki gue si Sapi'i udeh siap mao brangkat ke pasar. Emang biase sih, laki gue jam 8 pagi emang jatahnye ke pasar, soalnye siang ampe malem tu anak pan mesti jualan bakso ke kampung-kampung. Biasenye sih, sebelom magrib dagangannye ude pade tandas, soalnye langganan die banyak bener! sape dulu dong... laki ayeee~ (idung kembang-kempes). Lima menit kemudian, si abang Pi'i akhirnya berangkat ke pasar jalan kaki. emang ude kebiasaan die sih kalo tiap kepasar selalu jalan kaki. katenye sih biar tetep sehat ame fit (padahal cuma karena pasarnye juga deket, hohohoh~). Abang Pi'i akhirnya keluar rumah, trus jalan deh ke pasar. Di tengah jalan die ngelamun.

"Aduh., semalem ga dapet sun nih dari si yayang Eha.. kok berase kayak ade yang ilang ye??" gumam bang Pi'i. pikiran si abang Pi'i langsung balik lagi ke kejadian semalem. sambil jalan, die mikir tentang kesalahan die ame gue. "ah, semalem sih aye nekat ngasih tau si Eha kalo aye ditembak, jadi begini dah.. haduuuhhh..." keluh Pi'i lagi. pikirannya sekarang dipenuhi bayangan Eha. Pi'i masih aje terus berjalan dan terus ngelamun, sampai tiba-tiba die kagak nyadar kalo ada sepeda motor nyang jalannye kagak stabil mendekat dari arah belakang. Sepeda motor itu emang lagi dikendaliin ame anak-anak SMP nyang baru aje belajar motor. Secara tiba-tiba..

GDUBRUGGG !!

"Wadooowww!!" teriak Pi'i, kaget. Saking kagetnye, die ampe kaga bisa jaga keseimbangan trus akhirnya nyungsreb dengan sukses ke dalem got. Pi'i nyang kaget bukan kepalang, cuma bisa diem tanpa kate-kate setelah dengan suksesnye nyemplung ke got yang aernya item suritem bin bau. Shock abis. Die cuma bisa liat kaki ame badannye ude item trus bau gara-gara kesirem aer got. jatoh keduduk. sedangkan tampang si anak SMP nyang "nyenggol" Pi'i tadi pas liat keadaan si Pi'i yang belepotan aer got ude kayak orang abis liat hantu. pucet.

"aduu.. maap bang.. aye kagak sengaje..." ucap anak SMP itu memohon.

"....."

"yaude ya bang, aye pkoknye ude minta maap. aye jalan dulu ye bang... skali lagi, maapin ayeee.. muaach deh buat abaangg~"

Ngeliat si Pi'i cuma diem doang kayak sapi ompong, tu anak SMP akhirnya langsung ngambil kesempatan buat ngibrit sekenceng-kencengnye. takut kalo si Pi'i sadar, die bakalan dalem bahaya. Akhirnya anak SMP itu ngebut ngejalanin motornye, ninggalin Pi'i yang keadaannye masih setengah sadar setengah mimpi.

5 menit kemudian.

Pi'i tersadar. langsung liat sekeliling. trus pandangan matanye beralih ke baju dan celananya nyang masih bekubang ame aer got.

"HAAAAAAAAAHHHHH ?!! kok gue beginiiii?!"

Pi'i tereak histeris. lalu die langsung nginget-nginget ulang kejadian tadi. Pas die ude inget, die langsung ngomel besar. teriak-teriak sendirian. telat banget.

"Sialaaaaaaaannn!! anak setaaaaaaaaannnnn lo ye !! enak beneer lo tinggalin gue gitu aja setelah bikin gue nyungsep di got!! awass lo yee!! gue datenginn enyak babe lo nanti !! biar gue tuntut ke komnasham ! eh salah, ke pengadilan!! dasar anak tuyuuuuuuuulll!!" umpatnya sendirian. gak nyadar kalo ade anak kecil ame ibunye lagi lewat sambil ngeliatin si Pi'i dengan tatapan geli campur takut.

"Mak, mak, ade orang gilaa ngomel-ngomel sendiri noh mak.."

"Biarin aja nak, kite cepet ngibrit aje nak, ntar kite malah kena timpuk ame orgil ! jangan diliatin nak ! nanti udel elo ilang!"

"iyee makk.."

Pi'i langsung shock tahap dua. mukenye si Pi'i langsung pias pas dengerin percakapan si emak ame anaknye."Gara-gara anak setaan tadi gue dikira orgil! hah!" dumel Pi'i. lalu die langsung keluar dari selokan item bin bau itu.

"mane bisa kepasar nih kalo tampang kucel begini.. ah.. yaudah deh balik aje dulu ke rumah.." putus Pi'i. Akhirnya abang gue nyang tadinye wangi bin ganteng, ude bertransformasi jadi HULK nyang jelek end bauu. haduuu.. kasian bener dah. Pi'i kemudian langsung ngerubah tujuan, berbalik ke arah rumahnye. Sambil berjalan gontai, di samping kanan kirinye banyak orang nyang nyapa die langsung pada ngehindar. kagak tahan ame bau badannye die.

"Hadehh.. apess bener dah gue hari ini.." keluh Pi'i dalem hati di sepanjang perjalanan. "ape karena semalem kagak disun ame si yayang ye gue jadi gini?" pikirnya lagi."Ah, masa cuma kagak disun aje jadi kayak gitu. ga mungkin. karna gue lagi apes aje kalii ye hari ini.." gumam si Pi'i menepis prasangka buruk awalnye. Lagi asik-asiknye ngelamun, tiba-tiba si Pi'i dikejutin ama suara gonggongan anjing.

GUK ! GUK ! GUK !!

Pi'i nyaris kejungkang. ternyata di sampingnye die ade anjing nyang lagi ngegerem sambil masang tampang galak. dan pada saat itu posisinya ekor tu anjing lagi diinjek ame sendal bututnye si Pi'i. passss banget.

"Bujud buset !! kok bise ade anjing disini ?! mana horor gitu tampangnye ??" ucap Pi'i kaget bukan kepalang. die masih belom nyadar kalo die tuh lagi nginjek buntut si anjing. Pas pandangannye si Pi'i nelusurin badan ampe ke buntut si anjing, barulah die tau penyebab tu anjing jadi horor begono.

GUK! GUK! GUK! GRRR...!!

"Hoaaaaa.. uanjiiiiiiiingggggg~!!!"  serta merta Pi'i langsung ngibrit. Si anjing nyang dari tadi ude pasang badan, langsung ngejer si Pi'i dengan napsunya. terjadilah pemandangan nyang seru di pagi hari itu, antara anjing ame manusia. nyang satu napsu ngejer, nyang satu napsu ngehindar. bener-bener pemandangan yang sayang untuk dilewatin.

*** 

Rumahnye Sapi'i, pukul 09.00 pagi.

akhirnya abang gue yang nasipnye sial ntu nyampe di halaman rume-nye dengan tampang kucel, bau, item, plus acak-acakan. pokoknye ude mirip banget ame zombie. kalo aje kakinye ude kagak napak ke tanah, mungkin orang-orang percaye kalo bang Pi'i ude jadi zombie, ato makhluk jadi-jadian. dedemit pemakan perawan. ato dedemit nyang tukang nyulik anak kecil. hiyy. kalo aja bang Pi'i mao banting stir berkarir jadi zombie ato dedemit jadi-jadian, wah, bakalan sukses besar noh. abisnye tampangnye kali ini ngedukung banget buat karirnye ntu. pasti bakalan banyak nyang takut ame tampangnye die. ude gitu nanti bakalan banyakfansnye deh dari hantu-hantu semisal genderuwo, ato kuntilanak. bakalan kalah pamor dah setan-setan begono! tapi sayangnye abang Pi'i masih cinte mati ama karirnye nyang jadi juragan bakso kampung sebelah ntu.

"Assalamu'alaikuuuuuuuuuuuuuummm... nyaaaakk! enyaakkk...!"

"Wa'alaa-- masyaa Alloh !! Astagpirulloh !! ade dedemittttt po'on waru nyamperin aye ! mati deh aye.. mati deh aye.."

"yelah nyaak, jangan pingsan nyak !! ini Pi'i nyak, Pi'i !! anak enyak nyang paling ganteng ntu!!"

"Ape buktinye kalo elo Pi'i ?! Pi'i sih lebih ganteng dari elo, lah ini ? kucel dekil jelek kayak begono ! Pi'inye aye tampangnye mirip ame bintang sinetron Atalarik Syach ! bukan kayak begini !!"

"Yaelah nyak, aye tadi abis kesenggol motor, nyungsreb di got, trus dikejer anjing ampe aye terpaksa manjat po'on trus diem di atas po'on hampir 15 menit gara-gara tu anjing kagak mau pegi-pegi ! liat kaki aye nyak, masih napak nyaak, masii napaaaakk...! belom melayaang !!"

"La ilaha illallah Pi'i.... elo bikin emak hampir jantungan aje... knapa bisa kayak begini sih ?? "

"Ye kagak tau aye nyakk.. nyang jelas aye mao mandi ulang ! skalian mandi kembang ! jangan ade nyang ganggu aye ! pokoknye aye mao kaplingin no kamar mandi 1 jam ! aye mao mandi kembang dolo !"

tanpe ba-bi-bu lagi nih ye, bang Pi'i langsung cepet-cepet ngibrit ngambil handuk ke kamar trus ngebuka pintu kamar mandi belakang buat mandi. Di kamar mandi, die siap-siapin deh tuh sebotol samphoo, ame sebotol sabun. Pi'i kagak liat kalo aer bak mandi ude tinggal 1/5-nye. kagak bakalan cukup buat ritual "mandi besar"-nye si Pi'i. Tapi die cuek aje. Soalnya Pi'i ngiranye masih bisa nguras sekalian ngisi ulang tuh bak mandi. Langsung aje si Pi'i jebar jebur nyiram kepale ame badannye nyang ude gatel-gatel gara-gara kesirem aer got nyang bau ntu. Sambil nyanyi-nyanyi lagunye Meggy Z nyang "mandi kembang tengah malem", Pi'i asik nyabunin badan make sabun ame ngeramasin kepalenye ame samphoo, ampe semua isinye abis.

"Mandi kembang tengah malam

Jangan kau lakukan

Kalau hanya mengharap maaf dariku

Andai kau ingin kembali

Mengharap cintaku

Lupakanlah dosa dosamu yang lalu

Ho..o…o…kumaafkan semua salahmu..." 

Pi'i masih asik nyanyi-nyanyi sambil siul-siul. setelah 20 menit, Pi'i dah mao ngebiles badan ame rambutnye nyang penuh busa, tapi die liat aer bak mandi ude tandas. akhirnye Pi'i otomatis ngebuka keran kamar mandi gede-gede, nampung aer baru buat mandi. Tapi, ude berapa kali tuh keran dibiolak balik, dipelintir-pelintir ampe bener-bener melintir bangeet tu keran, eh malah kagak ade aer nyang keluar barang setetespun ! kagak ade nyang netes! P'i langsung shock buat nyang ke tiga kalinya sodara-sorada ! die panik sepanik-paniknye. mane lagi bugil begono, cuma ditutupin ame busa doang.

"ENYAAAAAAAAAAAAAAAAAAAAAKKKKKKK!!! AERNYEEE MANEEEE????!!" teriak Pi'i histeris dari dalem kamar mandi. Enyakye nyang ditereakin cuek bebek, asik nyapu halaman depan sambil dengerin radio makehandsfree. Sekali-sekali si enyak joget-joget ala Betawi ngikutin irame musik dangdut nyang ade di radio kecil nyang ditaro di dalem kemben bajunye. Same skali kagak denger anaknye ude treak-treak kayak kmabing nyang mao disembeleh.

"Buseddd dahhh!! mane lagi si enyak !? bener-benerrrr dah!! ape perlu gue nyang keluar neh ?!!" dumel Pi'i, kesel gare-gare dicuekin. "Ah, sebodo amat dah, keluar aje! dari pade kagak bise mandi !" putus si Pi'i. Akhirnye die mutusin juga buat keluar kamar mandi. Tapi, pas mau nyamber handuk, die bingung. kok handuknye dia raib. perasaan si Pi'i tadi ude nyamber handuk trus ngebawa ke dalem kamar mandi. Akhirnya Pi'i diem jadi patung, nginget-nginget kejadian tadi pas mau ke kamar mandi. Tiba-tiba dia tereak histeris sambil nepok jidatnya.

"Kampreeett gue lupaa kalo tu handuk tadi gue tinggalin lagi di meja makan pas lagi nyomot pisang molen !! sialaaannnnnnnnn!! ah, bodo amat !! modal nekaaaaaaaattt!! daripade kagak bisa mandi, mending keluar bugil dulu ! nyang penting masih ketutup busa !!"

Jreng jreng jreeng... akhirnya Pi'i keluar kamar mandi dengan keadaan nyang bugil. Haaduh. bener-bener kagak waras lagi dah laki gue.

GEDUBRAAKK !!!

Suara pintu kamar mandi dibuka. Muncullah si Pi'i dengan pose kayak Pahlawan Bertopeng-nye Shinchan. Modal nekat, si Pi'i abis itu lari ke depan nyamperin enyaknye sambil lari trus treakin name enyaknye.

"ENYAAAAAAAAAAAAAAKKKK SARIIIIIIIPAAAAAAAAAAAAAAAAAHHHHHH!!!" 

Si enyak langsung berenti dari kegiatan nyapu-nyapu halamannye. Langsung bediri diem.

"Perasaan ade nyang manggil name gue.."

"ENYAAAAAAAAAAAAAKKK WOOOOOOOYY!!!"

Si enyak langsung nyopotin hansfree-nya, trus nengok ke asal suara nyang tadi die dengerin kayak mangil-manggil namene ntu. Pas tau siapa nyang manggil, beliau langsung shock. Ternyata nyang daritadi manggilin die tuh anaknye, dalam keadaan bugil penuh busa. lagi bediri di pintu depan. 

"Masya Alloh Pi'i !!! ngapaen lo ?!! ude gila ?! hah ?! ngapaen pake acara bugil begono ?!! naujubilaaah anaak gueeee... !! heh!! pake baju !! mau ngapaen lo ?! abis ngapaen anak tetangga lo ?! hah !? setress lo ye !!"

Si enyak Saripah langsung ngomel-ngomel sambil ngacung-ngacungin sapu lidi, bersiap ngejer anaknye, suruh balik ke kamar mandi. Tapi si Sapi'i langsung tereak lagi.

"Lagian emak daritad aye panggilin, kagak nyahut !! itu aer nape bisa mati ?!! aye kagak bisa mandi!!"

"aer PAM emang lagi mati! lagien elo kagak nanya-nanya dulu!! sana balik !! kalo kagak balik aye pukul pake sapu lidi!!"

"Tapi aye kudu mandi dimane nyaaakkk?!?!"

"Baliikk sonooo ke kamar mandiiiiiiiiii!!!!"

"Ta--"

  

belom selese Pi'i ngelanjutin kalimatnya, si enyak ude keburu nguber Pi'i make sapu lidi. Jadilah pagi itu Pi'i lari marathon lagi barengan ame emaknye. Bakal jadi tontonan gratis orang-orang sekampung. Nasip Pi'i selalu aje sial terus hari itu. Kasian bener dah abang gue satu itu.

***

Masih dirumenye Pi'i, Pukul 11.00 Siang.

"Ampun nyaak, uampuuuunnn...!!" teriak Pi'i, sambil masuk kedalem rumenye; setelah cape' ngiterin halaman rume 40 kali, bareng enyaknye. "Heran deh gue, makan apaan enyak gue, bisa ampe kuat gitu ??? napsu banget kayaknye ngejar-ngejar gue !" gumam Pi'i dalem ati, rada-rada takut. Abis itu Pi'i langsung melesat ke kamar mandi sambil nyamber anduknye nyang tadi ketinggalan di meja makan, sambil cepet-cepet nutup pintu kamar mandinye. Takut sabetan sapu lidi WONDER WOMEN SARIPAH kena lagi ke badannye. Kalo kena'nye cume di badan ame di kaki sih kagak nape-nape, tapi kalo sampe kena "barang penting"?? bisa rusak mase depan seumur idup ! "TIDAAKKKKK~!" jerit Pii dalem ati sambil geleng-geleng kepale, ngebayangin mase depannye nyang gelap kalo sampe itu terjadi.

"Heh, Pi'i!! keluar loe !! bisenye cume ngerem doang di kamar mandi !!"

"yaelah nyaakk... abisnye enyak horor gitu ! lagian tadi kan enyak suruh aye masuk kamar mandi, kok skarang disuruh keluar lagi ?? ababil nih si enyak !"

"sabetan gue terakhir belom ngena tau ! cepet keluar !"

"ogaaahhhhhh!!"

Hening 5 menit. Pi'i nyang ude kedinginan bener gare-gare mandinye kagak selese-selese dari satu jam lalu udah rada-rada pucet mukenye. mirp orang nyang lagi bertransformasi jadi mayat."Lame-lame aye beku juga nih ! heran dah aye ! punye enyak kok sadis bin kejem ! kagak enyak, kagak pacar kejem semuenye ! bikin aye sial mulu ! ape emang nyang namenye cewek itu nyeremin semuanye ye??" dumel laki gue nyang pejantan tangguh ntu. (sebenernye gue kagak tega sih nyeritain bagian nyang ini :P) Pi'i masih ngerem di kamar mandi kayak ayam mao betelor. masih rada-rada takut die buat keluar kamar mandi. Die takut pas buke pintu kamar mandi, enyaknye nyang garong ntu langsung nyabet die make sapu lidi. Seketika Pi'i merinding ngebayanginnya. Die liatin sekujur badannye die. ude banyak tanda merah-merah di badannye die, tande "cinte" emaknye ame sapu lidi saktinye ntu. Tapi tiba-tiba, Pi'i mendadak heran. ude 5 menit ditungguin, di luar kayaknya heniiiiiinggg banget. Die tempelin tuh telinganye ke pintu kamar mandi, kagak kedengeran suare ape-ape di luar. "Sukur deh.. selameet aye.. selameettt... enyak ude pergi.." ucap Pi'i lega. Abis itu Pi'i langsung ngeringin badannye die, tanpa bilasan. Die biarin rambutnye nyang masih ditutupin ame busa ntu ampe nanti die nemu "mata aer" nyang bise die pake buat ngebiles rambut. "Sekarang nyang penting aye ude mandi, badan aye dah wangi walopun kagak dibiles make aer.." gumam Pi'i lagi, nyenengin ati. ude gitu die langsung ngelilit badannye make anduk, trus keluar kamar mandi. tapi tiba-tiba...

BYUUUUURR !!!

"Uapp.. uappp..." Seketika Pi'i langsung megap-mengap kayak ikan mas koki. Asli, kaget bin shock. Di depan Pi'i ude berdiri enyaknye dengan tampang horor sambil nentengin ember nyang aernya dibanjurin ke Pi'i tadi. Sumpah beneran kejem bener dah tu enyak Saripah !

"Noh airnye ! sekalian enyak bantuin ngebiles badan loe !"

"La ilaha ilallah enyaaaaaaaaaaaaakkkkk!!! tapi ga kayak gini carenyeee... masa langsung dibanjur begini ?! kalo aye tibe-tibe langsung end gare-gare gagal napas pegimane ?!"

"Enyak bikin anak baru ! ape susehnye sih ?!"

"Ya Alloh enyaakkk.. tega bener..."

"Ude cepetan keluar dari kamar mandi ! enyak mao make !"

"Pan kagak ade aernye nyakk??"

"Enyak nyolong aer sumur tetangge !"

"yaelah nyak, kagak bilang kalo di tetangge ade aer sumur ??"

"elo lagian kagak nanya! ude sana ! enyak mao buang hajat dulu!"

begitulah. Dengan keadaan masih basah kuyup plus ame handuk-handuknye, Pi'i lari-lari ke kamar, langsung beres-beresin badannye. Niat dalam ati Pi'i ude bulet, saat itu juga pengen ketemu aye, si Julekha nyang cantik bin seksoy ini (penonton langsung nimpukin bata). Pengen bener minta maap, kalo perlu ampe sujud-sujud dah. ude kapok banget seharian sial gare-gare berantem ame aye (idung kembang kempes pas lagi nyeritain).  

Sementara itu di rume Julekha...

"Duh, bang Pi'i kmane ye? kok aye jadi rada-rada khawatir ame die.. jangan-jangan knape-nape lagi.. semalem aye gak nge-sun die.." bathin aye, Julekha si cantik dari gua hantu. eh salah. Si cantik dari desa Subur Seger maksudnye. aye sebenernye emang khawatir banget sih, soalnye dari semalem abang aye nyang ganteng ntu kagak ngasih kabar ape-ape ame aye. yaah.. walopun emang aye rada-rada kesel ame kelakuan die, tetep aje bang Pi'i emang jawaranye dihati aye. Ude puluhan kali aye kluar masuk-keluar masuk rume, mondar mandir kyak strikaan angus gare-gare mikirin abang gue ntu.

"eh Leha ! ngapain lo mondar mandir - mondar mandir kek strikaan gitu ?? puyeng enyak ngeliat elo dari tadi kluar-masuk-keluar-masuk rume mulu !"

"Aye lagi nunggu Bang Pi'i nyak, kok ude jem segini gerobak baksonye belom keliatan ye ? biasenye jem segini ude ngider di kampung kite.."

"Yaelah Eha.. ya elo susulin aje sono ke kampung sebelah, ape susehnye sih ! empet gue liat elo dari tadi bolak-balik kayak orang mo berojol !"

"Oiya ya nyak, ih, si enyak tumben pinter!"

"Sembarangan lu ye ! lu kire emak lo bodong ape ?!"

"Ye.. kadang-kadang sih nyak.."

"Yeeeeeee... gue sabet lo make sapu, ye !"

"Ampuunn.. yaudee, aye pegi dulu ye nyak, mau nyusul si P'i'i dulu ! Assalamu'alaikuuuumm"

"Wa'alaukim salaam.."

Begitulah, akhirnya gue mutusin buat nyusulin abang gue ke kampung sebelah; tempat die biasa mangkal ngejajanin bakso. Abis kelar pamitan ama si enyak, gue langsung keluar rume, make sendal jepit butut merkswallow  nyang ude hampir uzur soalnye sendal jepit laen ilang dicolongin bocah-bocah kampung (penting ga sih gue nyeritain ini? *kabuuuurrr) tapi, baru aje gue nyampe depan pager bambu depan rume, tiba-tiba bang Pi'i muncul sambil lari-lari dari ujung jalan.

"Julekhaaaaaaaaaaaaaaaaa cintakuuuuuuuuuuuu~"

Gue yang baru aje mao ngebuka pager, langsung kaget dengerin teriakan abang aye nyang menggelegar itu. gue langsung loncatin tuh pager bambu, trus langsung nyambut abang aye nyang posisinye ude siap-siap meluk dri kejauhan.

"Yayaaaaaaaaaaaaaaaaaaaaaaaaangggg~"

"Julekhaaaaaaaaaaaaaaaa~"

(Aaa.. aa... aaa.. aaa... Tum paas aaye, yun muskuraaye~ *soundtrack lagu Kuch-Kuch Hota Hai*)

(adegan slow motion antara Pi'i & Eha nyang sambil lari-larian nyambut kekasih masing-masing sambil pasang ekspresi pengen pelukan..)

gue berasa kayak terbang ke langit ke tujuh pas ketemu abang gue ini. ternyata sehati juga gue ame die. akhirnya gue pelukan ditengah jalan ame die, sambil muter-muter ala Indihe gitu deh (rada lebay dikit! penonton kagak bole protes!)

"Abang, kok ga jualan bakso ?? ude jam segini.."

"Aduu yayang, aye hari ini liburan dulu deh jualannye.."

"Lah, emangnye knape yang?"

"Hari ini aye pengen minta maap ama Eha.."

"Lho, kok tiba-tiba bang?"

"Iye,, skalian aye juga mau minta sesuatu ama Eha. Tiap malem sun abang terus ye.. mule hari ini abang nggak akan ngecewain Eha lagi.. abang kapok.,"

"Lho, emang knape bang?"

"Kalo abang ngecewain Eha trus Eha ga ngasih sun sama abang, abang seharian kualat mulu... abang kapok yangg"

"Jadi, gara-gara ntuh abang hari ini kagak jualan?"

" iye.."

"Ya ampun yayangg.. kesian bangett.. yauda deh Eha maapin yayang.. Eha ga tega deh dengerin yayang menderita. tapi janji yayang ga akan gitu lagi ya.. janji yayang cuma buat Eha doang.."

"Iyaa Ehaa.. hati abang emang cuma buat Eha seorangg.. mwaah deh buat yayang~"

Akhirnye gue ame abang Pi'i pelukan lagi. berasa dunia milik berdua. Sampe seorang bocah tiba-tiba tereak disamping sambil ngeliatin bang Pi'i ampe matanye nyang bulet ampir keluar.

"Enyaakk, ade om-om cume make cangcut doangaannnn melukin tante-tante!!"

"Hust ! awas jangan diliatin !! ntar mata lo copot tong!!"

Aye nyang langsung nyadar akibat tereakan tuh bocah, langsung lepasin pelukan si abang sambil neliti badannye abang dari atas ampe bawah.

"Astagpiruloohh abaaaaang!! brarti daritadi abang kagak make celana!? cuma make cangcut doang?!"

"Hehe.. abis, abang buru-buru kesini. pengen cepetan minta maap.."

"ABANG DODOOOOOOOOLLL !! Cepet pake celana dulu !! berarti daritadi aye melukin om-om nyang kagak make celana !? cepet pake dulu ! kalo kagak kite putuss!!"

"Aw, jangan dong yangg~"

" cepet pulaaaaaaang.. pake celanaaa~!!"

"ogah ahh~"

"Abaaaaaaaaaaaaaaanggg!!"

Begitulah sodare-sodare. akhirnye aye ame abang aye baekan deh.. hehehe.. gimane, gimane? seruu ceritanye ?? kapan-kapan deh aye ceritain lagi kisah kasih aye ame abang aye nyang pastinye bakalan ngebuat elo-elo semua pade TERPESONAH ! hehehe... segitu dulu ye penonton~ Julekha mao cabcuzz dolo~ dadahhh~~

Cium Jauh,

JULEKHA